Monday, February 25, 2013

एकमेक - कविता महाजन


थोडावेळ बसू एकमेकांसोबत शांत
एकमेकांविषयी काही न बोलता.

मी सांगणार नाही की आजकाल
वाटतंय मरून जाईन रात्री झोपेतच.
स्वप्न पाहता-पाहता मरून गेलेलं माणूस
मेल्यावर कुठं जातं, हेही विचारणार नाही तुला.

तूही सांगणार नाहीस की
बाकी सारं कंटीन्यू होईलच पुढच्या जन्मात
जसं गेल्या जन्मीचं झालं या जन्मी
आणि प्रत्येक जन्मात आपल्याला
समजतेय एकमेकांची भाषा.

अजून काय हवंय आता
एका लहानशा निळ्या पूर्णविरामाखेरीज?