झाड गूढ झाड गूढ
ओल्या प्रकाशाची चूड
गार गार पारा गाळी
स्वप्नरंगांचे गारूड
झाड पाताळ फोडते
झाड आकाश वेढते
ताळ मूळ संसाराचे
गाठीगाठीत जोडते
झाड वाकडे तिकडे
छेडी फांद्यांची लाकडे
वीज थिजवून पोटीबा
वारी मेघांचे साकडे
झाड स्वछंदी आनंदी
सुखे होय जायबंदी
घावाघावातून धाडी
फुले ज्वाळांची जास्वंदी
झाड माझे वेडेपिसे
उन्ही जळताना हसे
रूसे धो धो पावसात
चांदण्यात मुसमुसे
वेडे झोपेत चालते
अर्ध्या स्वप्नात बोलते
गिळोनिया जागेपण
उभे आहे तो वाढते
